Персональный сайт: Борис Павлов
Персональный сайт: Борис Павлов

Ардах

Халлааҥҥа быйаҥ элбэх,
онтон саамай үчүгэйдэрэ
ардах быһыылаах...
Мин ньылбы сытыйабын,
Сөрүүн уу хаарыйбытыттан
дьагдьайабын,
Хахха сир көрдөөн
туора-маары
дьаадьайабын.
Туох буолуой,
барыта икки
өрүттээх :
Бу ардахтан алааһым
үөрбүт буолуохтаах.
Күүс ылан ходуһа
ситэн силигилээтэҕэ,
Кэрии тыаҕа кэҕэ иккистээн 
эттэҕэ.
Тиит төрдүгэр үлэһит
кымырдаҕастар үөрэн
сүүрэкэлээтэхтэрэ,
Чыс кутуйах сиигинэн
сирэйин сууннаҕа,
Кып кыра илиилэринэн
хараҕын ньуухханнаҕа.
Сир дойду сэргэхсийдэҕэ,
Чэбдик салгынынан 
чэпчээбиттиии
өрө тыыннаҕа.
Ньукулай оҕонньор
арбаҕастаах,
Отуутуттан оронон
тахсыахтаах,
Быйаҥ түспүтүттэн
көнньүөрэн
Айаҕын иһигэр баппат
киҥинэйэр ырыалаах
буолуохтаах.
Ол барыта ардахтан
тутулуктаах...
Күн сиригэр иэйии элбэх,
онтон саамай күүстээхтэрэ
ахтылҕан быһыылаах.
Бу олоххо туох да
быстыбат.
Барыта ситимнээх,
Барыта силистээх,
Барыта сибээстээх,
Барыта тирэхтээх.
Ханна эрэ үрэх баһыгар
киргил үөрүө,
Балаҕан иһигэр кыптый
кылыр гына тыаһыа, 
Дьоллоох ийэ үөрэн
мүчүк гыныа.
Халлааҥҥа кустук 
арылыйан
тахсыаҕа,
Үрэх үрдүгэр ырыа, 
Оҕуруо
курдук ыйанан туруо.
Саҥа киһи бу дойдуну
саҥалыы таптыа,
Ыраата бардаҕына мин
курдук туоххаһыйыа,
ахтыа,
Кииним түспүт сирэ диэн
истиҥник ааттыа.
Сүрэхтэн сүрэх сибээһэ
салҕана туруо,
Ону үөһэттэн ким эрэ ону
харыстаан, хаххалаан
туруо…


Возврат к списку
Издания автора
Дьолуо
Кэм-кэрдии... Олох… Таптал... Борис Павлов ураты поэзиятыгар.
Сахалар. Дьылҕа-хаан ыйааҕынан
Саха биллиилээх суруналыыһа Борис Иванович Павлов 90-с сылларга бэйэтэ туспа айар суоллаах ааптар быһыытынан ааҕааччыга биллибитэ. Кини бу кинигэтигэр саха чулуу дьонун дьылҕаларынан норуотун, көлүөнэтин инникигэ дьулуурун көрдөрүөн баҕарар.