Персональный сайт: Борис Павлов
Персональный сайт: Борис Павлов

Курус дэриэбинэм

Оҕо сааһым доҕотторо
Түспэтийбит буолуохтара,
Сүүрэн ааспыт ыллыктарым
Саба үүнэн туруохтара,
Курус, курус дэриэбинэм,
Ахтар, саныыр бөһүөлэгим,
Тоҕо баҕас хобдоҕой
Эргиппэтим бириэмэни.
Кыра, хара уолчааны
Сыллаан ылбыт
кырдьаҕастар
Сууллубатах түннүктэртэн
Хайгыы көрөн туруохтара.
Күлүөхтэрэ, үөрүөхтэрэ,
Санаан мүчүк гыныахтара,
Өтөхтөрүн, төрүттэрин
Саныыр эбит дьиэхтэрэ.
Сүүһүн ааспыт хара тураах
Хаппыт тииккэ олоруо,
Тэлгэһэҕэ оонньообут
Доҕотторбун сураһыа.
Хатыҥ тыалга суугунуо,
Саҥа ырыа ылланыа,
Сылайбыккын,
санньыйбыккын
Сөрүүн сүүрүк ыраастыа.
Сүрэх уотун умата
Күөрчэх өрө ытыллыа,
Дьөһөгөйү ааттата
Үрүҥ илгэ ыһыллыа.
Сэлэһиэхпит, кэпсэтиэхпит,
Түүнү быһа олоруохпут,
Тэрээссэлээх түннүккэ
Саһарҕаны көрсүһүөхпүт
Уруккуну санаһыахпыт,
Билиҥҥини билсиэхпит,
Өйдөөн санаан кэлиэхпит
Сүппэт ытык иэстээхпитин,
Айылҕалыын алтыһан
Өлбөт сүппэт үөстээхпитин.


Возврат к списку
Издания автора
Сахалар. Дьылҕа-хаан ыйааҕынан
Саха биллиилээх суруналыыһа Борис Иванович Павлов 90-с сылларга бэйэтэ туспа айар суоллаах ааптар быһыытынан ааҕааччыга биллибитэ. Кини бу кинигэтигэр саха чулуу дьонун дьылҕаларынан норуотун, көлүөнэтин инникигэ дьулуурун көрдөрүөн баҕарар.
Дьолуо
Кэм-кэрдии... Олох… Таптал... Борис Павлов ураты поэзиятыгар.