Персональный сайт: Борис Павлов
Персональный сайт: Борис Павлов

БААРЫҤ БУОЛЛАР

Мин хаһан да,
кимтэн да, тугу да
көрдөспөтөҕүм,
Тугу булбуппун,
бултаабыппын,
бар дьонтон
көҥөммөтөҕүм,
Олорбутум судургутук,
Сылдьыбытым улгумнук,
Саха этэринии
кээмэй орто чээрэтин
тутуспутум.
Ол да буоллар,
Оннук да гыннар,
Миэхэ олус наада:
Бу кэмҥэ,
Бу күҥҥэ,
Бу чааска,
Түгэҥҥэ -
АТТЫБАР ЭН БААРЫҤ
БУОЛЛАР.

Күн сирэ киэҥ,
Ол - бу эгэлгэ элбэх,
Киһи - аймах араастаан
аралдьыйар.
Элбэх үтүө сонуну
кэпсиир араадьыйа.
Үөрэбин эн чыычаах
курдук дайа
көтөргүттэн,
Көҥүл туртас курдук
сэгэйэ
сүүрэргиттэн,
Бар дьону кытта тэҥҥэ
саппай уопсаргыттан.
Ити да буоллар,
Инньэ да гыннар,
Бу кэмҥэ,
Бу күҥҥэ,
Бу чааска,
Мүнүүтэҕэ,
Сөкүүндэҕэ
АТТЫБАР ЭН БААРЫҤ
БУОЛЛАР.

Олох диэн дьикти,
Төһө да өр олор
тамаҕы кыайан
ханнарбаккын,
Баҕа санааны
үрүҥ хопто курдук
кыайан сиппэккин,
Сүрэх күн курдук,
уота хаһан да
умуллубат,
Икки атахтаах тапталы
ханна эрэ илдьиэх курдук
мунньарын кубулуппат.
Ол да буоллар,
Оннук да гыннар,
Бу кэмҥэ,
Күҥҥэ,
Чааска,
Түгэҥҥэ,
Чыпчылҕаҥҥа
АТТЫБАР ЭН БААРЫҤ
БУОЛЛАР.
Эн баарыҥ буоллар…
Эн баарыҥ буоллар…
Эн баарыҥ буоллар…
Эн баарыҥ буоллар…
Эн баарыҥ буоллар…
АТТЫБАР .

Борис Павлов




Возврат к списку
Издания автора
Дьолуо
Кэм-кэрдии... Олох… Таптал... Борис Павлов ураты поэзиятыгар.
Сахалар. Дьылҕа-хаан ыйааҕынан
Саха биллиилээх суруналыыһа Борис Иванович Павлов 90-с сылларга бэйэтэ туспа айар суоллаах ааптар быһыытынан ааҕааччыга биллибитэ. Кини бу кинигэтигэр саха чулуу дьонун дьылҕаларынан норуотун, көлүөнэтин инникигэ дьулуурун көрдөрүөн баҕарар.